កំពង់ឆ្នាំង៖ នៅថ្ងៃទី២១ ខែវិច្ឆិការ ឆ្នាំ២០២៣ គេសង្កេតឃើញនៅពីមុខអាស្រមព្រះអង្គធម្មវនវាសី ច័ន្ទ មុនី រាល់ថ្ងៃប្រជាពលរដ្ឋបាននាំគ្នាមកដកដើមស្មៅក្រៅពីមានជំនឿយ៉ាងមុតមាំថា ព្រះអង្គធម្មវនវាសី ច័ន្ទ មុនី គង់នៅវត្តចន្ទប្បជោត្តនារាម ហៅវត្តតាសុត ក្នុងភូមិភូមិប៉ាតឡាង ឃុំក្រាំងលាវ ស្រុករលាប្អៀរថា មានបារមីពូកែសក្តិសិទ្ធិ បានធ្វើឱ្យប្រជាពលរដ្ឋភ្លូកទឹកភ្លូកដី ទៅថ្វាយបង្គំព្រះអង្គ ដោយគ្មានស្រាកស្រាន្ត រហូតព្រះអង្គនិមន្តទៅកាន់ទីកន្លែងផ្សេងៗក៏មានអ្នកជ្រះថ្លារាប់ម៉ឺននាក់បាននាំគ្នាពពាក់ពពូនចូលទៅថ្វាយបង្គំព្រះអង្គ ។
ស្រាប់តែប៉ុន្មានថ្ងៃកន្លងមកនេះ បងប្អូនពលរដ្ឋដែល មានជំនឿ បាននាំគ្នាទៅបោចស្មៅនៅបរិវេណខាងមុខអាស្រមរបស់ព្រះអង្គ ដោយជឿថារុក្ខជាតិគ្រប់ប្រភេទ ជាឱសថព្យាបាលជំងឺយ៉ាងសក្តិសិទ្ធិ ។
លោក ហែម ទីន អាយុ៦០ឆ្នាំ ជាមេភូមិប៉ាតឡាង ឃុំក្រាំងលាវ បានប្រាប់តាមទូរស័ព្ទនៅរសៀលថ្ងៃទី២១ ខែវិច្ឆិកានេះថា រហូតមកដល់ពេលនេះក៏នៅតែមានប្រជាពលរដ្ឋនាំគ្នាទៅបោចស្មៅនៅមុខបរិវេណអាស្រមលោកនៅឡើយ ប៉ុន្តែគ្រាន់តែស្បើយជាងថ្ងៃមុន ។
លោកមេភូមិប៉ាតឡាង បញ្ជាក់ថា ប្រហែល២ថ្ងៃមុន បងប្អូនប្រជាពលរដ្ឋយ៉ាងច្រើននាំគ្នា មកដកស្មៅមុខអាស្រមព្រះអង្គ ច័ន្ទ មុនី ។ គាត់ក៏ដើរទៅសួរ ត្រូវបានបងប្អូនប្រជាពលរដ្ឋទាំងនោះប្រាប់ថា (ដកធ្វើថ្នាំ ដើមអីក៏ដោយនៅមុខអាស្រមព្រះអង្គ គឺជាដើមថ្នាំទាំងអស់) ។
លោកមិនដឹងថា បងប្អូនប្រជាពលរដ្ឋបានព័ត៌មាននេះពីណាមកទេ ? តាមគាត់សម្គាល់ រុក្ខជាតិដែលពួកគាត់បោចយកទៅនោះមានដើមស្មៅគ្រប់ប្រភេទ ដើមបន្លាប្រក្រាបជាដើមឱ្យតែដើមរុក្ខជាតិតូចៗ ដុះប្រឡោះដើមផ្កាម្លិះ (សួនផ្កាម្លិះលោកដាំ)គឺដកយកទាំងអស់ ដែលមកដល់ថ្ងៃនេះ រិចអស់ដើមស្មៅទៅហើយ ។
ចំពោះការអះអាងរបស់បងប្អូនប្រជាពលរដ្ឋថា យកទៅធ្វើថ្នាំ ពូកែឬមិនពូកែនោះលោកមេភូមិថា លោកមិនបានដឹងទេ ព្រោះមិនទាន់មាននរណាចេញមកអះអាងថាជាពីជំងឺអ្វីដែរ ។
មិនត្រឹមតែដើមស្មៅទេ ដែលបងប្អូនមានជំនឿថាជាឱសថព្យាបាល សូម្បីផ្កាឈូក ផ្កាម្លិះ ដែលគេយកថ្វាយព្រះក៏ពួកគាត់នាំគ្នាប្រមូលយកទៅដែរ ថាយកទៅដាំទឹកផឹកព្យាបាលរោគ៕
