តាកែវ៖ ក្រោយទទួលបានការស្នើសុំពីសំណាក់បងប្អូនប្រជាពលរដ្ឋនៅតាមបណ្ដោយផ្លូវលំចូលវត្តថ្មកែវ ស្ថិតនៅឃុំត្រាំកក់ ស្រុកត្រាំកក់ ខេត្តតាកែវអោយជួយជួសជុលផ្លូវលំមួយខ្សែប្រវែងជិត ៣គីឡូម៉ែត្រ ដែលកំពុងជួបការលំបាកខ្លាំងក្នុងការធ្វើដំណើរឆ្លងកាត់ ក្រោយរដូវភ្លៀងធ្លាក់មានចង្ហុកធំៗ ទឹកដក់ ឥឡូវនេះ ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ បានបញ្ជារអោយមន្ទីរជំនាញអភិវឌ្ឍន៍ជនបទខេត្ដតាកែវ ធ្វើការជួសជុលឡើងវិញ ដោយចាក់គ្រួសក្រហមហើយ នៅព្រឹកថ្ងៃ ១៣ ខែវិច្ឆិកា ឆ្នាំ២០១៣នេះ ។ លោក លីវ សំណាង ប្រធានមន្ទីរអភិវឌ្ឍន៍ជនបទខេត្តតាកែវ បានអោយដឹងថា ក្រោយទទួលបានការស្នើរសុំពីសំណាក់ បងប្អូនប្រជាពលរដ្ឋ ដែលកំពុងធ្វើដំណើរលើដងផ្លូវលំមួយខ្សែខាងលើ កំពុងមានសភាពលំបាក ក្រោយស្ថាន ភាពរដូវភ្លៀងធ្លាក់ បង្ករអោយផ្លូវមានសភាពខូចខាត មានចង្ហុកធំៗ និងមានទឹកដក់ជាច្រើន ពិបាកដល់ការធ្វើដំណើររបស់បងប្អូនប្រជាពលរដ្ឋ សិស្សានុសិស្ស ឥឡូវនេះត្រូវបានចាប់ផ្ដើមជួសជុល កែលម្អឡើងវិញហើយ បន្ទាប់ពីមានការដឹកនាំបញ្ជាផ្ទាល់ពីសំណាក់ ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ។ លោក លីវ សំណាង បន្តរថា ការជួសជុលផ្លូវមួយខ្សែនេះ យើងត្រូវឈូស និងគៀរយកដីជ្រាំចេញពីផ្លូវ រួចចាក់ដីគ្រួសក្រហម ពីលើបន្ថែម ដើម្បីធានាអោយបានគុណភាពផ្លូវមានសភាព ធនជាប់បានយូរ ហើយការជួសជុលផ្លូវមួយខ្សែនេះ ដែរអាចប្រើប្រាស់ពេលវេលា មួយសប្ដាហ៍ ដូច្នេះសូមបងប្អូនប្រជាពលរដ្ឋមានការយោគយល់ និងសម្រួលការធ្វើដំណើរទៅតាមផ្លូវវៀងនានាដែលទៅបាន។ តំណាងក្រុមប្រឹក្សាឃុំត្រាំកក់ បានអោយដឹងថា ផ្លូវមួយខ្សែនេះជាផ្លូវលំមួយសំខាន់ ដែលតរភ្ជាប់ព្រំប្រទល់ពីស្រុកត្រាំកក់ ខេត្តតាកែវ ដល់ស្រុកអង្គរជ័យ ខេត្តកំពត ដែលអាចអោយបងប្អូនប្រជាពលរដ្ឋរាប់រយគ្រួសារធ្វើចរាចរណ៍ឆ្លងកាត់លើផ្លូវនេះ ដឹកជញ្ជូនកសិផល ដំណាំបន្លែ មកទិញលក់ដូរនៅក្នុងផ្សារត្រាំកក់ផងដែរ។
