ប្រធានអង្គភាពនគរបាលទេសចរណ៍ថ្មី ប្រចាំខេត្តសៀមរាប លោកវរសេនីយ៍ទោ ប៊ឹក បូភក្រ ត្រូវបានប្រកាសចូលកាន់មុខតំណែង បន្ទាប់ពីប្រធានអង្គភាពចាស់លោក ទី សុខឡែន ត្រូវបានដកចេញដោយសារការដឹកនាំមានភាពមិនប្រក្រតី។ ពិធីប្រកាសចូលកាន់មុខតំណែងនេះធ្វើឡើងនៅព្រឹកថ្ងៃទី២៦ ខែមេសា ឆ្នាំ២០២៤ នៅសាលប្រជុំសាលាខេត្តសៀមរាប ។
លោកឧត្តមសេនីយ៍ឯក ប៊ុន ដា ប្រធាននាយកដ្ឋានកណ្តាលសណ្តាប់ធ្នាប់សាធារណៈ ដែលអញ្ជើញជាអធិបតីក្នុងពិធីប្រកាសនេះ បានថ្លែងថា នេះជាលើកទី៥ហើយដែលអង្គភាពនគរបាលទេសចរណ៍ ប្រចាំខេត្តសៀមរាប បានធ្វើការតែងតាំងប្រធានអង្គភាពថ្មី ខណៈប្រធានអង្គភាពមុននេះ (លោក ទី សុខឡែន) កាន់តួនាទីបានត្រឹមរយៈពេល៨ខែប៉ុណ្ណោះ។ លោកថា ក្នុងពេល៨ខែ ការគ្រប់គ្រងអង្គភាពមួយគឺក្តាប់មិនបានគ្រប់សភាពការណ៍ការងារនោះទេ ប៉ុន្តែដោយសារការដឹកនាំមានភាពមិនប្រក្រតីខ្លះទើបសម្រេចផ្លាស់ប្តូរចេញ។
បើទោះជាយ៉ាងណា លោកឧត្តមសេនីយ៍ ប៊ុន ដា រំពឹងថា ថ្នាក់ដឹកនាំអង្គភាពថ្មីនឹងពង្រឹងការងារ មានសាមគ្គីផ្ទៃក្នុងអង្គភាពល្អ ក៏ដូចជាសហការល្អជាមួយស្ថាប័នពាក់ព័ន្ធនានានៅក្នុងខេត្តសៀមរាប រក្សាបាននូវក្រមសីលធម៌ល្អ សំដៅលើកកម្ពស់តម្លៃកងកម្លាំងនគរបាលជាតិ ក៏ដូចជាលើកតម្លៃប្រទេសជាតិ ជាពិសេសខេត្តសៀមរាបដែលជាតំបន់ទេសចរណ៍ដ៏មានសក្តានុពលរបស់កម្ពុជា។
ចំណែកក្នុងនាមអាជ្ញាធរខេត្តសៀមរាប លោក សំកុល សុចិត្រា អភិបាលរងខេត្តក៏បានជំរុញដល់ប្រធានថ្មីនៃអង្គភាពនគរបាលទេសចរណ៍ត្រូវខិតខំធ្វើកិច្ចសហការជាមួយអង្គរភាពនានាដើម្បីថែរក្សាបាននូវសន្តិសុខសណ្តាប់ធ្នាប់ជូនភ្ញៀវទេសចរជាតិ អន្តរជាតិ ក៏ដូចជាថ្នាក់ដឹកនាំគ្រប់ជាន់ថ្នាក់។ ជាមួយគ្នានេះក៏ត្រូវខិតខំយកចិត្តទុកដាក់អនុវត្តឲ្យខានតែបាននូវរាល់បទបញ្ជា ផែនការណែនាំក៏ដូចជាផែនការការពារផ្សេងៗដែលថ្នាក់ដឹកនាំជាតិ ក៏ដូចជាថ្នាក់ដឹកនាំគណៈបញ្ជាការឯកភាពខេត្តបានដាក់ជូន។
សូមជម្រាបថា កាលពីពេលថ្មីៗនេះ លោកវរសេនីយ៍ទោ ទី សុខឡែន អត្តលេខ៦៨៤៣៩ ប្រធានអង្គភាពនគរបាល ទេសចរណ៍ប្រចាំខេត្តសៀមរាប ត្រូវបានមន្ត្រីក្រោមឱវាទ ធ្វើការស្នើសុំទៅអគ្គស្នងការនគរបាលជាតិ ដើម្បីសុំដកចេញពីតំណែង ដោយសារទង្វើររបស់លោកវរសេនីយ៍ទោ ទី សុខឡែន មិនយល់ពីតួនាទីភារកិច្ចរបស់ខ្លួន ធ្វើអោយមាន ការរិះគន់ពីស្ថានប័នពាក់ព័ន្ធ ភ្ញៀវទេសចរណ៍ និងមហាជន បណ្តាលអោយអាប់ឱនកិត្តិយសអង្គភាព ដែលពីមុនធ្លាប់មានការកោតសរសើរពីថ្នាក់ដឹកនាំគ្រប់ស្ថាប័ន និងថ្នាក់ដឹកនាំ ធ្វើអោយមន្ត្រីនៅក្នុងអង្គភាពបែកបាក់សាមគ្គីភាពផ្ទៃក្នុង និងអស់សេចក្តីទុកចិត្តគ្រប់ៗគ្នា ។
បន្ទាប់ពីមានការស្នើសុំនេះ អគ្គស្នងការនគរបាលជាតិ បានសម្រេចដកតួនាទីរបស់លោក ទី សុខឡែន ពីប្រធានអង្គភាពនគរបាលទេសចរណ៍ប្រចាំខេត្តសៀមរាប ដោយតែងតាំងលោក ប៊ឹក បូភក្រ ជំនួសវិញ៕
