កំពង់ឆ្នាំង៖ លោក សាន់ យូ អភិបាលរងខេត្ត តំណាងឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង បានអញ្ជើញជាអធិបតីភាពក្នុងពិធីប្រកាសផ្សព្វផ្សាយតំបន់វិនិច្ឆ័យលើការចុះបញ្ជីដីធ្លីមានលក្ខណ:ប្រព័ន្អ សម្រាប់ភូមិតាកាប និងភូមិយោត ឃុំខ្លុងពពក ស្រុកទឹកផុស ខេត្តកំពង់ឆ្នាំង ដោយមានការចូលរួមពីលោក ឈុន សុខកុម្ភ: អនុប្រធានមន្ទីររៀបចំដែនដីនគររូបណីយកម្មសំណង់ និងសូរិយោដីខេត្ត និងលោក សូត្រ សង់ អភិបាលស្រុកទឹកផុស ព្រមទាំងតំណាងមន្ទីរពាក់ព័ន្អ រួមនិងមន្រ្តីភូមិបាលស្រុក អាជ្ញាធរភូមិ.ឃុំផងដែរ នៅថ្ងៃទី១៤ ខែវិច្ឆិកា ឆ្នាំ២០២៣។
បន្ទាប់ពីលោក សូត្រ សង់ អភិបាលស្រុកមានមតិស្វាគមន៍ អំពីសភាពការណ៍ទូទៅនិងស្ថានភាពភូមិសាស្ត្រនិងការរស់របស់ប្រជាពលរដ្ធក្នុងមូលដ្ធានស្រុក និងបានថ្លែងអំណរគុណចំពោះការខិតខំប្រឹងប្រែងរបស់មន្រ្តីបច្ចេកទេស នៃមន្ទីររៀបចំដែនដីនគរូបណីយកម្មសំណង់ និងសូរិយោដីខេត្ត ដែលបានធ្វើសកម្មភាពនៅមូលដ្ធានស្រុកទឹកផុសរហូតមក ។
លោកអភិបាលស្រុកបានអោយដឹងទៀតថាឃុំមួយចំនួនក្នុងស្រុកបានធ្វើការវាស់វែងនិងចែកបណ្ណរួចរាល់ហើយដែរ ដោយឡែកឃុំខ្លុងពពកមាន០៧ភូមិ ហើយការផ្សព្វផ្សាយកំណត់តំបន់វិនិច្ឆ័យពេលនេះមាន០២ភូមិគឺភូមិយោត និងភូមិតាកាប ។
លោក ឈុន សុខកុម្ភ: អនុប្រធានមន្ទីរបានគូសបញ្ជាក់ថា កិច្ចប្រជុំនេះគឺដើម្បីផ្សព្វផ្សាយជាសាធារណៈ នូវដំណើរការចុះបញ្ជីដីធ្លីមានលក្ខណៈជាប្រព័ន្ធ រួមមានការកំណត់ព្រំដី ការវាស់វែង និងការវិនិច្ឆ័យ ដែលអនុវត្តផ្ទាល់ដោយមន្ត្រីជំនាញ នៃមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត សហការជាមួយអាជ្ញាធរដែនដី និងមន្ទីរ អង្គភាពគ្រប់គ្រងដីរដ្ឋដែលពាក់ព័ន្ធ ហើយការចុះបញ្ជីដីធ្លីនេះគឺ ត្រូវចុះបញ្ជីទាំងដីឯកជន ទាំងដីរដ្ឋ ដែលអនុវត្តទៅតាមនីតិវិធី និងបច្ចេក វិទ្យាទំនើប មានតម្លាភាព និងការទទួលខុសត្រូវ ហើយមានប្រសិទ្ធិភាពលើការគ្រប់គ្រងដីធ្លី។នេះគឺជាប្រការសមស្របបំផុត ដែលបានកំណត់នៅក្នុងគោលនយោបាយដីធ្លីរបស់រាជរដ្ឋាភិបាល ដើម្បីកាត់បន្ថយភាពក្រីក្រទំនាស់ដីធ្លីនៅក្នុងសង្គម។
លោកបានបន្តទៀតថាដើម្បីអោយដំណើរទៅបានលឿនសុំបងប្អូនទាំងអស់ត្រៀមនូវឯកសារពាក់ព័ន្ធមានសៀវភៅគ្រួសារ សំបុត្រកំណើត សំបុត្រអាពាហ៍ពិពាហ៍ អត្តសញ្ញាណប័ណ្ណជាដើម ។
ថ្លែងក្នុងឱកាសនោះ លោក សាន់ យូ អភិបាលរងខេត្តបានមានប្រសាសន៍ថា កិច្ចប្រជុំផ្សព្វផ្សាយនេះ គឺជាយន្តការរបស់រាជរដ្ឋាភិបាល។
ការចុះបញ្ជីដីធ្លីជូនប្រជាពលរដ្ឋ គឺដើម្បីធានានូវសិទ្ធិធ្វើជាម្ចាស់កាន់កាប់ និងជាឯកសាររឹងមាំមួយសម្រាប់ម្ចាស់ដីដែលបង្ហាញពីការកាន់កាប់ស្របតាមច្បាប់យ៉ាងពិតប្រាកដ ពិសេសទៀតនោះការចុះបញ្ជីដីធ្លីនេះ បានធ្វើឱ្យបញ្ហាទំនាស់ដីធ្លីត្រូវបានកាត់បន្ថយជាបន្តបន្ទាប់។
លោកអភិបាលរង ក៏បានជំរុញដល់ក្រុមការងារឱ្យបង្កើនសកម្មភាពរបស់ខ្លួនថែមទៀត ក្នុងការចុះវាស់វែងដីធ្លី នៅក្នុងតំបន់គោលដៅឱ្យបានលឿន ដើម្បីឆ្លើយតបទៅនឹងសេចក្តីត្រូវការចាំបាច់របស់ប្រជាពលរដ្ឋ។
ជាមួយគ្នានេះ លោក បានអំពាវនាវដល់ប្រជាពលរដ្ឋទាំងអស់ មានការយោគយល់គ្នានិងចូលរួមសហការឱ្យបានល្អ ជាមួយអាជ្ញាធរនិងមន្រ្តីជំនាញ ដើម្បីសម្រួលការងារ និងដំណើរការឱ្យបានរលូន៕
