រីកំពង់ឆ្នាំងៈ វគ្គបណ្តុះបណ្តាល វិបស្សនា ធុរះ រយៈពេល៣ខែនៅវត្តខេមវន្ត(ហៅវត្តខ្សាម) ស្ថិតក្នុងសង្កាត់ខ្សាម ក្រុងកំពង់ឆ្នាំង ត្រូវបានប្រារព្ធបិទនៅរសៀលថ្ងៃអាទិត្យទី ២៩ ខែតុលា ឆ្នាំ២០២៣ ក្រោមព្រះអធិបតីភាពព្រះវិមលញាណ ឆន ឆុង ព្រះអនុគណក្រុងកំពង់ឆ្នាំង តំណាងព្រះទេពមុនី សុខ ថាន ព្រះមេគណខេត្តកំពង់ឆ្នាំង ដោយមានការនិមន្តចូលរួមពីព្រះសិរីធម្មញាណ នុច មុនី ព្រះលេខាធិការគណខេត្ត និង ជាគណៈគ្រប់គ្រង វត្តខេមវន្ត ហៅវត្តខ្សាម លោកយាយឧបាសិកាព ឃុន ណាវី គ្រូវិបស្សនា និង ភិក្ខុ សីលវន សីលវតី ចំនួន៨៨អង្គ/នាក់ ចូលរួមផងដែរ។
លោកយាយឧបាសិកា ឃុន ណាវី គ្រូវិបស្សធុរៈ បានបញ្ជាក់អោយដឹងថាៈ ក្រោមការដឹកនាំរបស់ព្រះសិរីធម្មញាណ នុច មុនី គណៈគ្រប់គ្រងវត្ត បានរៀបចំអោយមានវគ្គវិបស្សនាធុរៈវគ្គ១នេះឡើងមានរយះពេល៣ខែ ចាប់ ថ្ងៃទី០២ ខែ សីហា ឆ្នាំ២០២៣ ដល់ថ្ងៃអាទិត្យ ទី១៥ កើត ខែ អស្សុជ ព.ស ២៥៦៧ ត្រូវនិងថ្ងៃទី ២៩ ខែ តុលា ឆ្នាំ ២០២៣ ក្នុង វត្តខេនវន្ត (ហៅវត្តខ្សាម) ត្រូវបានបញ្ចប់ដោយជោគជ័យ ដែលមានភិក្ខុ សីលវន្ត១០អង្គ/នាក់ សីលវតី ចំនួន៧៨នាក់។
លោកយាយឧបាសិកា ឃុន ណាវី គ្រូវិបស្សធុរៈ បានបញ្ជាក់អោយដឹងបន្តថាៈគោលបំណងសំខាន់គោលបំណងនៃការធ្វើវិបស្សនាធុរៈកម្មដ្ឋានគឺឆ្ពោះទៅរកគោលដៅផ្លូវចិត្តយ៉ាងខ្ពស់បំផុត នៃការរំដោះទុក្ខ និង ការត្រាស់ដឹងពេញបរិបូណ៌។
គោលដៅរបស់វិបស្សនា គឺមិនមែនសម្រាប់ព្យាបាលជំងឺផ្លូវកាយឲ្យបានជាសះស្បើយទេ។ ប៉ុន្តែដោយសារលទ្ធផលបន្ទាប់បន្សំ ដែលកើតមកពីការធ្វើចិត្តឲ្យបរិសុទ្ធផូរផង់ នុះមានជំងឺផ្លូវចិត្ត និង ផ្លូវកាយជាច្រើនណាស់ដែលបានជាសះស្បើយដាច់ឫសគល់ឣស់។ តាមការពិត វិបស្សនា គឺប្រាកដ ជារំលាយហេតុបីយ៉ាង នៃសេចក្ដីទុក្ខទាំងឣស់បាន ពោលគឺ៖ លោភ: ទោស: និង មោហ:ដោយសារការបដិបត្តិយ៉ាងជាប់ជានិច្ច សមាធិនឹងជួយបន្ធូរបន្ថយភាពតានតឹង ដែលចេះតែមាននៅក្នុងការរស់នៅរាល់ថ្ងៃ ហើយជួយស្រាយចំណងដែលកើតឡើងដោយសារទម្លាប់ចាស់ ដែលចេះតែនាំចិត្តឲ្យធ្វើប្រតិកម្មតបនឹងស្ថានភាពជាទីរីករាយ និង ជាទីមិនរីករាយ។
ព្រះសិរីធម្មញាណ នុច មុនី បានមានសង្ឃដីកាបញ្ជាក់អោយដឹងថាៈ ទិសដៅបន្តរបស់គណៈគ្រប់គ្រងវត្តខេមវន្ត ពេលបញ្ចប់ វគ្គវិបស្សនាធុរៈវគ្គនេះទៅ និង បន្តរៀបចំវគ្គវិបស្សនាធុរៈវគ្គ២បន្តទៀត ដើម្បីបណ្តុះបណ្តាលសីលវន្ត សីលវតី ដើម្បីអប់រំអោយមនុស្សទាំងអស់មានចិត្តស្ងប់និងធ្វើអោយសង្គមគ្រួសារនិងសង្គមមនុស្សមានចិត្តស្ងប់ប្រកបដោយសន្តិភាពគ្មានអំពើហឹង្សា។
ព្រះវិមលញាណ ឆន ឆុង បានមានសង្ឃដីកាថ្លែងនូវការកោតសរសើរដល់គណៈគ្រប់គ្រងវត្តខេមវន្តដែលបានរៀបចំអោយមានវគ្គបណ្តុះបណ្តាលនេះឡើង និង ថ្លែងនូវការកោតសរសើរដល់លោកយាយឧបាសិកា ឃុន ណាវី បានយកចំណេះមកផ្សព្វផ្សាយដល់សីលវន្ត សីលវតី និងបានបញ្ចប់វគ្គសិក្សារយះពេល៣ខែនៅពេលនេះ។
ព្រះវិមលញាណ ឆន ឆុង បានមានសង្ឃដីកាផ្តាំផ្ញើដល់សីលវ័ន្ត សីលវតី ទាំងអស់ដែលបានបញ្ចប់ការសិក្សានៅថ្ងៃនេះត្រូវយកចំណេះដឹងនេះផ្សព្វផ្វាយបន្ត ដើម្បីក្រុមគ្រួសារអ្នកជិតខាង និង សហគមន៍ ជាពិសេសមនុស្សនៅក្នុងសង្គមមានចិត្តស្ងប់ចេះអនុគ្រោះអធ្យាស្រ័យអោយគ្នាទៅវិញទៅមក ធ្វើអោយមនុស្សក្នុងសង្គមគោរពច្បាប់ប្រកបដោយសន្តិភាពក្នុងចិត្តគ្រប់ៗគ្នា៕
