ខេត្តពោធិ៍សាត់៖ មន្ទីររៀបចំដែនដីនគរូបនីយកម្ម សំណង់និងសុរិយោដីខេត្តនិងរដ្ឋបាលស្រុកបាកាន បានអំពាវនាវទៅដល់ប្រជាពលរដ្ឋម្ចាស់ក្បាលដី ស្ថិតនៅក្នុង ភូមិចិនតាយភូមិកោះខ្សាច់ និង សម្រោងព្រៃខៀវ ឃុំមេទឹក ស្រុកបាកានខេត្តពោធិ៍សាត់ចំនួន៩៣៦គ្រួសារ សូមអញ្ជើញមកពិនិត្យផ្ទៀងផ្ទាត់អំពីបញ្ជីឈ្មោះរូបរាងដី នៅលើសន្លឹកផែនទី ដែលមន្ត្រីជំនាញមន្ទីរ រៀបចំដែនដីនគរូបនីយកម្មសំណង់និងសុរិយោដីខេត្ត បានបិទប្រកាសផ្សាយ ជាសាធារណៈក្នុង រយៈពេលតែ១៥ថ្ងៃ ថាបានត្រឹមត្រូវហើយ ឬនៅដើម្បីឱ្យក្រុមការងារធ្វើការកែសម្រួលមុននឹងចេញប័ណ្ណកម្មសិទ្ធិស្របច្បាប់ដែលបានធ្វើឡើងនៅវត្តនន្ធូរារ៉ាម ហៅវត្តកោះខ្សាច់ នៅរសៀលថ្ងៃទី១១សីហា២០២៣។
លោក ឱន សទ្ធា ប្រធានមន្ទីររៀបចំដែនដីនគរូបនីយកម្ម សំណង់និងសុរិយោដីខេត្តពោធិ៍សាត់ បានឱ្យដឹងថា ភូមិទាំង៣នេះ ចាប់ផ្តើមដំណើរការវាស់វែង នៅដើមខែកុម្ភៈ និងបញ្ចប់នៅដើមខែឧសភាឆ្នាំ២០២១ នៅលើផ្ទៃដីសរុប១.៤០៧,៣១ហិកតា ។
ក្រោយពីធ្វើការវាស់វែងនិង ប្រមូលទិន្នន័យដែលមានចំនួន២៣៩០ក្បាលដី ក្នុងនោះលំនៅឋានមានចំនួន ៧៩៥ក្បាល.ដីកសិកម្មមានចំនួន១.៣៣១ក្បាលដី ម្ចាស់បានមកបំពេញទិន្នន័យមានចំនួន២១៣០ក្បាលដី ម្ចាស់មិនបានមកបំពេញទិន្នន័យចំនួន២៦០ក្បាលដី ក្រៅពីនោះដីវត្ត ដីសាលារៀននិងដីកប់ខ្មោច ត្រូវបានប្រជុំបិទប្រកាសផ្សាយជាសាធារណៈចំនួន១៥ថ្ងៃ សម្រាប់ឲ្យបងប្អូនប្រជាពលរដ្ឋជាម្ចាស់ក្បាលដីទាំង៣ភូមិមកពិនិត្យ ផ្ទៀងផ្ទាត់ឈ្មោះនិងរូបរៀងដីរបស់ខ្លួន។
លោក ប្រធានមន្ទីររៀបចំដែនដី នគរូបនីយកម្ម សំណង់និងសុរិយោដីខេត្ត បានពន្យល់និងណែនាំដល់ប្រជាពលរដ្ឋជាម្ចាស់ក្បាលដីទាំងអស់ត្រូវយកបង្កាន់ដៃ អត្តសញ្ញាណបណ្ណ័ សៀវភៅគ្រួសារ សំបុត្រកំណើត ពិនិត្យលើប្រភេទទ្រព្យ បញ្ជីឈ្មោះរូបរាងដី ទាំងដីកសិកម្ម ដីលំនៅដ្ឋាននិងចំនួនក្បាលដីមានគ្រប់ចំនួនតាមការគ្រប់គ្រងរបស់ខ្លួនហើយឬនៅ បើមិនទាន់គ្រប់ជ្រុងជ្រោយទេនោះធ្វើការតវ៉ា និងកែតម្រូវ រួចផ្តិតមេដៃចំពោះមុខមន្ត្រីប្រចាំការនៅទីនោះ បើមិនដូច្នេះទេក្រុមការងារមិនទទួលខុសត្រូវឡើយ។
លោក ផាយ ឡេង អភិបាលនៃគណៈអភិបាលស្រុកបាកាន បានលើកឡើង គោលនយោបាយដីធ្លីនេះ ត្រូវបានប្រមុខរាជ រដ្ឋាភិបាល ក្រោមការដឹកនាំប្រកបដោយ គតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះ រាជាណាចក្រកម្ពុជាដែលមានក្រសួងនិងមន្ទីររៀប ចំដែនដី នគរូបនីយកម្ម សំណង់ និងសុរិយោដីរាជធានី ខេត្ត ជាសេនាធិការនោះ បានយកចិត្តទុកដាក់ និងគិតគូរខ្ពស់បំផុតក្នុងការ ចុះបញ្ជីដីធ្លីមានលក្ខណៈជាប្រព័ន្ធជូនប្រជាពលរដ្ឋងាយស្រួលក្នុងការគ្រប់គ្រង បែងចែកនិងប្រើប្រាស់ប្រកបដោយប្រសិទ្ធភាព។
លោកបានបញ្ជាក់ថា ដីស្ថិតក្នុងតំបន់១មានសិទ្ធិគ្រប់គ្រង បែងចែកនិងប្រើប្រាស់ទៅតាមតម្រូវការ តែដោយឡែក ដីស្ថិតក្នុងតំបន់២និងតំបន់៣ ត្រូវបានបញ្ចូលជាតំបន់២គឺមានសិទ្ធិក្នុងការអាស្រ័យផលប៉ុណ្ណោះមិនអាចបែងចែក ផ្ទេរឬលក់បានឡើយ។
លោកក៏បានសម្តែងភាពរីករាយដោយសារបងប្អូនជាម្ចាស់ទ្រព្យបានចូលរួមបំពេញការតព្វកិច្ចបានគ្រប់ជ្រុងជ្រោយនិងគ្មានទំនាស់ ហេតុក្នុងនាមប្រធានគណកម្មការរដ្ឋបាលថ្នាក់ស្រុកនិងមន្ទីរជំនាញ សូមឲ្យបងប្អូនប្រជាពលរដ្ឋគ្រប់បណ្តាភូមិទាំងអស់ មេត្តាជម្រុញនិងជួយផ្សព្វផ្សាយ ដល់បងប្អូនយើងដើម្បីឲ្យពួកគាត់ បានមកចូលរួមពិនិត្យផ្ទៀងផ្ទាត់អំពីបញ្ជីឈ្មោះ រូបរៀងដីនិមួយៗដែលបានបិទផ្សាយជាសាធារណៈក្នុងរយៈពេល១៥ថ្ងៃ រួចហើយក្រុមការងារបូកសរុបនិងចេញប័ណ្ណកម្មសិទ្ធិជូនដល់ប្រជាពលរដ្ឋជាម្ចាស់ដីសម្រាប់យកទៅប្រើប្រាស់តាមផ្លូវច្បាប់ គ្មានការភ័យខ្លាច ៕
