ខេត្តសៀមរាប៖ មានករណីជនបរទេសម្នាក់បានស្លាប់ នៅក្នុងក្រុងសៀមរាប កាលពីព្រឹកថ្ងៃទី២៦ ខែមេសា ឆ្នាំ២០២៣។
សមត្ថកិច្ចបាន ឱ្យដឹងថា ប្រជាពលរដ្ឋបានរាយការណ៍មកថា មានជនបរទេសម្នាក់បានស្លាប់នៅចំនុច លំនៅដ្ឋានមួយកន្លែង ស្ថិតនៅភូមិស្ពានជ្រាវ សង្កាត់សៀមរាប ក្រុងសៀមរាប ខេត្តសៀមរាប។
សមត្ថកិច្ចបន្តថា ភ្លាមៗនោះជំនាញបានចុះទៅដល់កន្លែងកើតហេតុ ឃើញថាពិតជាមានបុរសម្នាក់ ដែលមានឈ្មោះ COLLINS DARRYL LELEO អាយុ ៧៦ឆ្មាំ ជាជនជាតិ អូស្ត្រាលី កាន់លិខិតឆ្លងដែនលេខPB២៩៨៧០៥៦ មុខរបរ ចូលនិវត្តន៍ បច្ចុប្បន្នស្នាក់នៅទីតាំងកេីតហេតុខាងលលើ បានស្លាប់ប្រាកដមែន។
សមត្ថកិច្ចបន្ថែមថា តាមការសាកសួរឈ្មោះ ស៊ង់ សុម៉ាលី ភេទស្រី អាយុ៤៧ឆ្នាំ ជាអ្នកបោសសំអាតផ្ទះ បានអោយដឹងថា កាលពីវេលាម៉ោង ០៩ និង ០០ នាទីព្រឹកថ្ងៃទី២៦ ខែមេសា ឆ្នាំ២០២៣ ពេលដែលខ្លួនកំពុងធ្វើការបោសសម្អាតនៅបរិវេណខាងក្រោមផ្ទះជនរងគ្រោះ ក៏លឺសូរសំលេងទូរស័ព្ទរោទ៍នៅលេីផ្ទះចំនួន ០២ដង តែពុំមានអ្នកទទួល រួចខ្លួនក៏ឡើងទៅមេីល និង ដេីររកជនរងគ្រោះ ស្រាប់តែឃើញជនរងគ្រោះបានដេកស្លាប់ នៅក្នុងបន្ទប់ទឹកបាត់ទៅហើយ។ ឃើញដូច្នេះខ្លួនក៏បានស្រែកហៅអ្នកជិតខាងជួយ និង រាយការណ៍ជូនសមត្ថកិច្ចចុះមកពិនិត្យតែម្តង។
សមត្ថកិច្ចបានបញ្ជាក់ថា តាមការស្រាវជ្រាវរបស់សមត្ថកិច្ចជំនាញ និងលោកគ្រូពេទ្យអមតុលាការ បានសន្និដ្ឋានថា ជនរងគ្រោះស្លាប់ដោយសារ ស្ទះសសៃឈាមបេះដូង និង រលាកសួតធ្ងន់ធ្ងរ។
បច្ចុប្បន្ន សាកសពបានបញ្ជូនទៅតម្កល់ទុកបណ្តោះអាសន្ននៅវត្តទឹកថ្លា រាជធានីភ្នំពេញ ដើម្បីរង់ចាំការសម្រេចពីក្រុមគ្រួសារនិងស្ថានទូត៕
